Connect with us

Լուրեր Հայաստանից

ԳԼԽԱՎՈՐ

Հրաժարում հրաժարականներից. ինչ պատահեց ԲՀԿ, Հայրենիք, ՀՅԴ եռյակի հետ

ԲՀԿ, Հայրենիք եւ ՀՅԴ կուսակցությունների եռյակի աշխատանքային խումբը տարածել է հայտարարություն, որտեղ գնահատել է կորոնավիրուսի դեմ կառավարության պայքարը: Ավելորդ է թերեւս ասել, որ եռյակը պայքարը գնահատել է խիստ անբավարար: Հատկանշական է, որ գնահատականից բխող եւ ձեւակերպված պահանջները գործնականում առնչություն չունեն բուն համավարակի եւ դրա հակազդման խնդիրների հետ, այլ փաստացի առնչվում են ներքաղաքական դիմակայությանը.

«Անհապաղ դադարեցնել սահմանադրական ինստիտուտների կազմալուծման հակապետական ընթացքը: Վերջ տալ ազգային արժեքներին, ինքնությանը և հանրային դիմադրողականությանը սպառնացող օտարածին օրակարգերի սպասարկմանը միտված գործողություններին: Վերանայել և չեղարկել համավարակին հակազդելու պատրվակով ոչ իրավաչափ հարկադրանքի միջոցների կիրառումը, այդ թվում՝ վարչականտուգանքները»:

Իհարկե, պահանջների տրամաբանությունն էլ բխում է այն հանգամանքից, որ եռյակի գնահատմամբ էլ կառավարությունը կորոնավիրուսի համաճարակն է օգտագործում քաղաքական խնդիրների եւ նպատակների համար:

Եռյակի հայտարարության մեջ հատկանշական է այլ բան՝ հրաժարականի պահանջի բացակայությունը: Դա ուշադրության է արժանանում այն պատճառով, որ օրեր առաջ այդ պահանջները հնչում էին, օրինակ ԲՀԿ նախագահի, այլ պատգամավորների, գործընկեր ուժերի ելույթներում, խոսքում, ակնարկներում:

Ինչու՞ է կուսակցությունների եռակը հրաժարվել կառավարության հրաժարականի պահանջից: Ընդ որում, հատկանշական է այն, որ նախօրեին էլ ծավալուն հայտարարություն էր տարածել ԲՀԿ նախագահը, որում եւս որեւէ խոսք չկար հրաժարականի այն պահանջի մասին, որ հնչեցրել էր Ծառուկյանը շաբաթներ առաջ:

Իհարկե, քաղաքական ռացիոնալության առումով հրաժարականի պահանջի բացակայությունը քաղաքական այդ միավորների համարժեքության ցուցիչ է: Հարցը կամ հետաքրքիրն այն է, թե ինչու՞ չկար այդ համարժեքությունը շաբաթներ առաջ, եւ կային հրաժարականի անհամարժեք պահանջներ, եւ ինչն է առաջացրել ռացիոնալություն ու համարժեքություն եւ հանել հրաժարականի պահանջները:

Արդյո՞ք եղել է ավելի մեծ ուժ, որը կուսակցությունների եռյակին ստիպել է մի քանի օր կամ շաբաթ առաջ անել հրաժարականի հայտարարություն, իսկ այժմ չի տեսնում դրա անհրաժեշտությունն ու նպատակահարմարությունը: Թե՞ բանը ոչ թե ստիպելն է, այլ ինչ որ սխալ ազդակներ փոխանցելը, ինչն էլ այդ ուժերի մոտ բերել է իրականության սխալ գնահատման եւ անհամարժեք պահանջի:

Հնարավոր է, իհարկե, դիտարկել տարբեր վարկածներ, ընդհուպ այն, որ խնդիրը կարող էր լինել նաեւ եռյակի ներսում, հաշվի առնելով այն հանգամանքը, որ ԲՀԿ նախագահը կարծես թե այդուհանդերձ խաղում է առանձին, ընդ որում բավականին հակասական: Օրինակ, Գագիկ Ծառուկյանը օրեր առաջ արեց հայտնի հայտարարությունը «հակառուսականության ալիքի» եւ դրա դեմ պայքարի իր պատրաստակամության մասին, որին, սակայն, նրա գործընկեր Հայրենիքն ու ՀՅԴ-ը չմիացան: Ավելին, Հայրենիքի նախագահ Արթուր Վանեցյանը հաջորդ օրը արեց մեկ այլ հայտարարություն, բոլորովին այլ թեմայով՝ հանրային համերաշխության անհրաժեշտություն:

Ծառուկյանը նախօրեին էլ տարածեց լայն ու ծավալուն հայտարարություն, որով փաստորեն Նիկոլ Փաշինյանին հայտնում էր հաշտության պատրաստակամություն, հիշեցնում, որ ինքը եղել է կամուրջ սոցիալական դժգոհության եւ կառավարության միջեւ մինչեւ հեղափոխությունը, ըստ այդմ թերեւս ակնարկում, որ պատրաստ է լինել նաեւ տնտեսական ծանր վիճակում, այսինքն ամենեւին չի ուզում լինել վարչապետ՝ կբավարարվի «կամուրջի» կամ «բուֆերի» կարգավիճակով:

Ըստ ամենայնի, ԲՀԿ նախագահի մոտ կա մտայնությունը, որ իր շուրջ ձեւավորվող գործակցության եռյակը ոչ թե գալիս է իր դրոշի հետեւից, այլ կարգավիճակի, այսինքն, այսպես ասած, «ընդդիմադիր առաջնորդի» կարգավիճակի հետեւից: Ընդ որում, ԲՀԿ նախագահի համար առավել քան պարզ չէ թերեւս այն, թե իսկ ո՞վ է գալիս այդ ուժերի հետեւից: Ըստ ամենայնի, հենց այդ անորոշությունն էլ նրան մղել է Փաշինյանի հետ պայմանավորվելու պատրաստակամություն հայտնելուն, քանի որ այդտեղ է դիտարկել իր համար առավելագույն կանխատեսելիությունը:

Դրանից հետո հատկանշական է երեք կուսակցությունների հայտարարությունը ընդամենը աշխատանքային խմբի մակարդակում:


Նյութի աղբյուր

Facebook Comments
Continue Reading

ԳԼԽԱՎՈՐ

To Top